رهان من طرف واحد بقلم عادل عبد الله
رهان من طرف واحد
للكاتب عادل عبد الله
تامر عندي خبر يا حسن عارف أنه هيزعلك لكن لازم تعرفه !!
حسن خير ربنا يستر .
تامر علا أتخطبت .
حسن بتقول ايه !! أنت بتتكلم جد
تامر أيوه يا حسن أنا عارف أنك مش هتصدق لكن دي الحقيقة .
حسن علا أتخطبت !!! ليه وأزاي وأمتي والحب اللي بينا راح فين !!
تامر ياما قولتلك إن علا مش بتحبك يا حسن زي ما أنت بتحبها علا بتاعت مصلحتها ومع اول عريس جاهز كانت لازم هتوافق علطول .
حسن مش ممكن !!!
تامر معلش يا حسن دي الحقيقة .
حسن بعصبية أتخطبت لمين
تامر هتتفاجئ !!
حسن بعصبية شديدة أتكلم انطق اتخطبت لمين
تامر أتخطبت لهاني .
حسن هااننني !!! مش ممكن !! ده هاني صاحبي وعارف أني بحبها !!!
تامر هو ده اللي حصل يا حسن هاني خطبها يوم الجمعة اللي فات وهيتجوزوا أول خميس في الشهر الجاي .
حسن أنا مش مصدق !! أنا حاسس إن أنا في كابوس !!!
تامر أنا بقا مش مصډوم أن علا تعمل كده اللي أنا مصډوم فيه بجد هاني !!
حسن أنا طول عمري وأنا حاسس إن هاني بيكرهني لكن مكنتش متخيل إن يوصل به الكره والحقد للدرجادي !!
تامر هاني هيكرهك ليه ليه بتقول كده
حسن فاكر لما نجحنا في ثانوية عامة وأنا دخلت كلية هندسة وهو دخل كلية تجارة يومها أنا شوفت الحقد في عينيه وهو بيقولي أوعا تفتكر إن دي النهاية مسير الأيام هتثبتلك إن أنا أنجح منك ومستقبلي هيكون أحسن من مستقبلك .
تامر هاني قالك كده !!
حسن أيوه ومن يومها كل ما يشتري حاجة جديدة كان يتصل بيا ويعرفني انه أشتراها !! و لما هاني أشتري أول عربية اتصل بيا وجالي تحت البيت وقالي شوف ايه رأيك في عربيتي بعدها لما غير العربية بعربية غيرها أحدث عمل نفس الكلام وقبل ما يمشي سألني أنت لسه بتركب الأتوبيس ولما قولتله ايوه ضحك بشكل مستفز وقالي عقبالك لما تشتري عربية زي دي .
تامر ياااه !!! وليه الغل والحقد ده كله في قلبه !!
حسن مش عارف واللي أنا مش عارفه ومستغربه أكتر هو بيجيب الفلوس اللي ظهرت عليه فجأة كده منين !
تامر أنا مش عايز أظلمه وأقول كلام مفيش عليه دليل لكن كلنا عارفين إن هاني ممكن يعمل أي حاجة علشان الفلوس .
حسن بعصبية يعمل اللي يعمله بعيد عني المهم عندي أنه ميأخدش حبيبتي مني .
مرت أيام حاول حسن الوصول فيها لحبيبته علا ...
مئات الرسائل عشرات مرات الاتصال دون
حتي وجدها يوما تسير وحدها بالشارع فأوقفها ...
حسن بقا كده يا علا !! تسبيني وتتخطبي
علا معلش يا حسن الجواز قسمة ونصيب .
حسن وحبنا !! وأرتباطنا ببعض !!
علا أحنا أخر مرة كنا مټخانقين فيها يا حسن .
حسن ياما أتخانقنا وياما أتصالحنا دي مش أول مرة نزعل مع بعض لكن كنا بنرجع وحبنا بيكون أقوي وأكبر .
علا خلاص بقا دي كانت أخر مرة وخلاص كل واحد يشوف طريقه .
حسن ليه ليه تبعدي وتوافقي تتجوزي غيري
علا قولتلك الجواز قسمة ونصيب يا حسن .
حسن وتتخطبي لمين ! لهاني صحبي !! ليه فيه ايه هاني
زيادة عني
علا هاني مش وحش يا حسن وأي بنت تتمناه كفاية أنه طموح و لسه متخرج من سنتين من الجامعة وبقا عنده شقة وعربية وفلوس في البنك وقريب أوي هيكون رجل أعمال أد الدنيا .
حسن تبيعيني علشان كده
علا مستقبلي معاه هيكون أحسن .
حسن وأنتي تعرفي هو جاب الفلوس دي منين
علا أكيد من شغله و مجهوده طبعا .
حسن ده فين الشغل اللي يجيب الفلوس دي كلها في وقت قصير كده !! أكيد هاني بيعمل حاجة غلط وأخرته هتكون وحشة يا علا .
علا أي حد حقود لما بيشوف واحد أنجح منه بيقول
حسن قصدك أني پحقد عليه
علا ده الواضح من كلامك .
حسن مادام وصل بيكي الحال لكده لدرجة إنك مش تشوفي الصح من الغلط يبقا فعلا خسارة أفكر فيكي ثانية واحدة أنتي فعلا تستاهلي واحد زي هاني .
بعد تسع سنوات ...
يرن هاتف حسن ليري اسم صديقه تامر علي شاشة الهاتف !!
حسن يخربييييتك ياض يا تامر أنت فين وحشني أوووي .
تامر أنا موجود أهو انت اللي مبتسألش يا حسن .
حسن معلش يا تامر ما أنت عارف مشغوليات الحياة والبيت والعيال .
تامر عارف يا صحبي المهم مش هتعرف تفضي نفسك يوم نتقابل ونقعد مع بعض شوية
حسن يا صحبي أفضيلك نفسي مخصوص ده أنت واحشني اوي ونفسي أشوفك ده أنت من العيد اللي فات مشوفتكش ولا قعدنا مع بعض .
تامر ماشي يا حسن ده فيه واحد بقا من تسع سنين مشوفتوش و كمان طلب يشوفك وهتتفاجئ لما تشوفه .
حسن مين
تامر هاني صحبنا فاكره ولا نسيته
حسن بحزن نسيته !! لا طبعا عمري ما أنساه .
تامر قابلته بالصدفة ولما شافني طلب نرتب يوم ونقعد مع بعض وتكون أنت موجود معنا .
حسن ما تعفيني أنا يا تامر ما أنت عارف أني مقاطعه من ساعت ما تجوز علا .
تامر يا صحبي الكلام
